Sundhedsassistenti sulerisarpa?

Ilinniakkat tunngavigalugit peqqinnissakkut sullissinermi pisariaqartitanik nammineerlutit naliliisinnaassaatit, tungiuninermi suliassanik aaqqissuisinnaassaatit, aallartitsisinnaassaatit suliaqarsinnaasallutillu.

Ilinniartinneqarnikkut peqqissaanermi immikkut ittunik suliaqarsinnaassaatit. Pikkorissarnikkut imal. aaqqissuussamik suliassanik ilinniartitaanikkut piginnaaneqarfigilikkanik soorlu –qinnguartaanermut-, kinguaassiuutitigut nappaatinik misissuinermut, tusilartulerinermut, ernisussiornermut, tarnimikkut nappaatilinnik sullissinermut meeraaqqerinermullu akisussaaffeqalersinnaavutit

Qinnuteqarneq, aningaasatigut ikiorserneqarneq inissaqarnerlu

Ilinniarnermut tunngatillugu allaffeqarfik qinnuteqarnissamut-, ilinniagaqarnersiuteqarsinnaanermut-, kollegiamiissinnaanermut-, nalinginnaasunillu allanik apeqqutigisinnaasannut tunngatillugu paasissutissiissaaq.

Ilinniartitaanerup aaqqissuussaanera

Sundhedsassistentitut ilinniarneq sivisussuseqarpoq ukiunik marlunnik qaammatinillu qulinik. Ilinniagaq sap.ak. arfineq pingasut atuagarsornermik aallarnerneqartarpoq. Tamatuma kingorna sap.ak qulit sulinermik misiliineq, sap.ak. 47-ut atuagarsorneq, sap.ak. 58-it sulinermik misiliineq inaarutaasumillu sap.ak. tallimat atuagarsorneq allattariarsorluni suliaqarnermik oqaluttariarsorlunilu misilitsinnermik naggaserneqartoq.

Atuagarsorneq Nuummi Peqqissaanermik Ilinniarfimmi ingerlanneqartarpoq.

Ilinniagaq pillugu siunnersortinneq

Ilinniagaq pillugu siunnersuivik sundhedsassistentitut ilinniarneq pillugu apeqqutissaqaruit piareersimavoq.

Piumasaqaatit

Peqqissaanermik ikiortitut imal. assingusumik ilinniarsimaneq inaarutaasumik misilitsinnermi C-mik angusaqarfiusumik meeqqallu atuarfianni inaarutaasumik misilitsinnermi ima angusaqarsimanissaq: kalaallisut qallunaatut kisitsinermilu C.

imaluunniit: Ilinniarnertuunngorsimanissaq (GU) karakterit makku angusaralugit soraarummeersimalluni: qallunaatut qaffasissutsimi A-mi D-mik karakteereqarneq, matematikkimi pinngortitalerinermilu/science qaffasissutsimi C-mi D-mik karakteereqarneq.

Sooq ilinniagaq qinnuteqarfiginerlugu qallunaatut namminneq allagaqaateqarnissaq (motiveret ansøgning) qinnuteqaammut ilanngussassaq.

Sulinermik sungiusarfiit

Ilinniartussatut akuerisaaguit illoqarfigisanni sulinermik sungiusarsinnaanissat Peqqissaanermik Ilinniarfiup sapinngisamik qulakkeerniassavaa. Sulinermik sungiusarninni peqqinnissaqarfimmi kommunimilu angerlarsimaffinni peqqissaaneq ikiorteqartitsinerlu ilisimasaqarfigilissavatit. Sulinermik sungiusarnerpit nalaani sungiusaasoqartinneqassaatit Peqqissaanermillu Ilinniarfimmi attavigisartagaqartinneqassallutit.