Piviusuusaartitsineq tunngavigalugu ilinniartitsineq

Peqqissaanermik Ilinniarfimmi piviusuusaartitsineq tunngavigalugu ilinniartitsineq ilinniartitaanerni tamani atorneqarpoq. Piviusuusaartitsineq tunngavigalugu ilinniartitseriaatsit assigiinngillat.

Piviusuusaartitsineq ataatsimut isigalugu tassaavoq ilinniartitsinermi suliffimmi pisut ilanngunneqarnerat. Eqqarsaatersuutiginninneq isummersorfigineqarnerlu aqqutigalugit sungiusarnissamut ilinniarnissamullu periarfissiisoqartarpoq. Tamanna sulilernissannut piareersarlutit ilisimasassanut sulinermullu piginnaasaqarnerulersinniarlutit, suliffimmi pisartunik assigiinngitsunik ajornakusoortunik sungiusarnissamut periarfissiivoq.

Tamanna ilaatigut imaaliornikkut pisarpoq:

Suliffimmi pisartunik suleriutsinilluunniit sungiusarneq: Nikisitsineq, inissiineq, inuttut eqqiluisaarnissamut ikiuunneq imal. nakorsaatit atorlugit nakorsaaneq. Tamanna inimi aaqqissuussami, suliffimmi takujumaakkannut eqqaanartunik, piginnaasanik assigiinngitsunik suliffimmi suliaqarnermi atugassannik nukittorsaasussanik atortulersukkami ingerlanneqassaaq.

Piviusuusaartitaq- piviusuusaartitsinerlu: filmiliortoqartarpoq, ilinniakkani sammisat eqqarsaatersuutiginissaat nukittorsarneqartarpoq - ilisimasanillu sulinermilu piginnaasanik atassusiisinnaalluni. Filmiliortarneq, eqqarsaatersuutiginneriaaseq iliuuserisallu suut sunniuteqarluarnerannik immaqalu allatut iliuuseqarfigineqarsinnaanerannik oqallisiginninnissamut pitsaasuusoq, paasinarsivoq.

Isiginnaartut peqataatillugit piviusuusaartitsineq: Ilinniaqatigiit tamakkerlutik peqataasinnaapput. Piviusuussaartitsinertigut annikitsutigut akunnattoorfiit imal. aaqqiagiinngissutit aallaaviussapput, ilinniaqatigiillu pisoq isumaliutigissavaat akunnattoorfiillu iliuuseqarfiginissaanut siunnersuusiorlutik.

Piviusuusaartitsineq ilinniartitsinermi periutsitut: Eqimattatut sungiusagassamut isissaasi. Inuusat teknologi nutaanerpaaq atorlugu sanaat imal. napparsimasuusaartut, suliffigiligassanni pisartunik misigeriikkannik misigiumaakkannilluunniit pilersitseqataasut atorneqassapput. Illit napparsimasuusaartut inuusalluunniit akunnissinni, sullulimmik quisarfilimmik paaqqutarinninnerpit allanilluunniit suliaqarnerpit peqatigisaanik oqaloqatigiinnikkut, sunniivigeqatigiissaasi. Ilinniartitsisuit inuusaq oqalutsissavaa. Aaqqissuussineq aalajangersimasoq naapertorlugu sulissaagut. Immikkoortut pingasuupput: Piareersarneq (briefing) – suliffimmi pisumik (sungiusagassamik) – eqqarsaatersuutiginninneq isummersorfiginninnerlu (debriefing). Tamanna atuagarsornikkut ilisimalikkanik sulinermilu piginnaasarilikkanik misilittagaqalersitsisunik isumaliutiginnissinnaanerit misilittagareriikkavilluunniit sammivimmi nutaami takusinnaanissaannik nukittorsaassaaq.

Sooq piviusuusaartitsineq?

Ilisimavarput piviusuusaartitsineq:

ilinniarnerup nalaani piginnaasanik sunik angusaqarsimasutut misiginermik nukittorsaasartoq.
ilinniartitsinermi kajumissutsimik eqqarsaatersuutiginninnermillu
sulinermik inuussutissarsiumullu sammititamik ilinniagaqassutsikkut piginnaasaqalernissamik takutitsisartoq.
piginnaasanik suullu ukkannissaannik tigussaasumik isummersortitsisartoq.

Piviusuusaartitsinerup iluaqutitai

Atuagarsornermi ilikkakkat sulinerullu imminnut atassusernissaannut periuseq siunnerfilik.
Suliat sungiusarnissaannut periarfissinneqassaatit
Sungiusakkat eqqarsaatersuutiginissaannut sungiusassaatit iliuuserisatillu tunngavilersorlugit, sungiusakkap ingerlanerani unittoqarsinnaavoq tassanngaanniillu qanoq iliornissaq pitsaanerusoq paasiniarneqarsinnaalluni (itisiliilluni ukkassineq)
Avatangiisini isumannaatsuni ilinniarneq. Tamanna kukkussagaluaruit innuttaasunut piviusunut sunniuteqarnaviannginneranik isumaqarpoq.

Qanoq?

Ilinniartitaanerit silarsuaanit pisut sumiiffiillu issuarniarsaraagut. Immikkoortortaasinnaavoq, Miss Spangebob Square-iusinnaavoq imal. tarnimikkut nappaatilinnut immikkoortortami iniusinnaalluni. Ini pisoqarfiusoq ilinnut piviusumut assingusutut misinnarsitillugu aaqqisuussaavoq.

Piviusuusaartitsigaangatta ersarissumik suut anguniarneqarnerat nassuiarneqartarpoq. Immikkoortut taakku pingasut ima aaqqisuussaapput; Piareersarneq (briefing) nalinginnaasumik oqaatsit atorlugit ingerlanneqartarpoq, ilaali allattariarsukkatut ingerlanneqarsinnaasarluni. Piareersarneq ataatsimut isigalugu sungiusakkami suut naatsorsuutigisinnaagitit inillu qanoq aaqqissugaanera immaqalu atortussanik assigiinngitsunik atuisinnaanissannut ilisimatinneqassaatit. Sungiusagassaq (Scenarie), pisup immaqalu piareersarnerup kingorna sungiusagassaq aallartinneqassaq. Ilinniartut napparsimasumik/innuttaasumik/ qanigisaasumik /peqqinnissakkut sullissisunik allanik sullissisut ataatsip sisamallu akornanniikkajupput. Peqataasut sinneri suliat ingerlanneqarneranni alaatsinaattutut suliakkerneqartarput. Sungiusagassamik isiginnaarneq ilinniarfiungaatsiarsinnaavoq. Eqqarsaatersuutiginninneq (Debriefing), taanna siniffiup killingani inimiluunniit allami ingerlanneqarsinnaavoq. Eqqarsaatersuutiginninnermi atuagarsukkat siulinerullu imminnut atassusersernissaannut periarfissinneqassaatit. Taamaalillutit ilinniakkanni ilisimasatit iliuuserisannut tunngavilersuutitut atussavatit.