Forstanderimik ilinniarfiup ingerlalluaannarnissaanik qulakkeerisussamik, kajumittumik piumassusilimmillu siumullu takorluuisinnaassusilimmik, ilinniartitaanerit ilinniarfiullu sammisaasa allat – ilinniarfiup anguniagassatut takorluugai iliuusissatullu siunniussai aallaavigalugit inerisaajuarnissamik qulakkeereqataaniarluni siuttoorusuttumik pissarsiorpugut.

Peqqissaanermik Ilinniarfik, aqutsinermik, isumaginninnermut peqqinnissamullu tunngatillugu ilinniarfimmi sulisut ilinniarfiullu suleqatigisartagai allat qanimut suleqatigalugit, ilinniartitaanikkut neqeroorutinik allanittaaq inerisaanissamik soqutigisaqarluinnartumik forstanderissarsiorpoq.

Atorfiniffissaq: 1. april 2023 immikkulluunniit isumaqatigiissuteqarnikkut.

 

Atorfik

Peqqissaanermik Ilinniarfik nunatsinni kisiartaalluni peqqinnissamut tunngaviusumik ilinniartitaanernik ingerlatsisuuvoq. Ilinniarfimmi maanna neqeroorutaapput peqqinnissamut tunngatillugu ilinniartitaanerit assigiinngitsut arfineq marluk, tamatuma saniatigut pikkorissaanernik assigiinngitsunik ilinniartitaanernillu modulikkaartunik neqerooruteqarfiusumik, pikkorissaanermut immikkoortortaqarpoq. Ilinniarfik ukiumut untrilillit missaannik ilinniartoqartarpoq, 200-illu missaannik pikkorissartoqartarluni, sulisut 25-iupput takkunannga 13-it ilinniartitsisuullutik. Sinneri allaffissornermik kiffartuussinermillu suliaqarput.

Ilinniarfik nutaaliaavoq, teknologi ullutsinnut naleqquttoq atorneqarluni kusanartunillu avatangiiseqarluni.

Peqqissaanermik Ilinniarfik, aaqqisuussaanikkut pisortat ataanni namminersorluni ingerlavoq forstanderilu aaqqisuussaanikkut ilinniarfiup siulersuisuisa ataanni inissisimalluni.

Pingaarnertut suliassatit tassaassapput:

• Ilinniarfimmi ulluinnarni suliassanut, tamatumunngalu atatillugu allaffissornikkut, aningaasaqarnikkut, ilinniagaqassutsikkut ilinniartitsinikkullu, ilinniarfiup ataatsimut suliassaanik aqutsinermi pingaarnertut akisussaasuuneq
• Siulersuisut, nunatsinni inuussutissarsiutinut qitiusumik ilinniarfiit Ilinniartitaanermullu Naalakkersuisoqarfik suleqatigalugit, pitsaassutsimik qulakkeerinissami, inerisaanissami kiisalu suliniutinik nutaanik atuutilersitsinissami suleqataaneq

Naatsorsuutigaarput:

• Peqqissaasutut -imal. peqqinnissamut tunngasumik allamik ilinniagaqarnissat naapertuuttumillu kandidatinngorsimanissat
• Aqutsinermik, allaffissornikkut ingerlatsinermik aningaasaqarnikkullu aqutsinermik misilittagaqarnissat
• Iliuusissanik siunniussinermik misilittagaqarnissat
• peqqinnissaq pillugu tunngaviusumik ilinniartitaanerit misilittagaqarfiginissaat
• kalaallisut oqaasiliunissat imal. kalaallinik inuiaqatigiinnik kalaallillu kulturiannik ilisimaarinninnissat
• suleqatiginninnermut ataaveqatigiinnermullu piginnaaneqarluarnissat, ilungersunartorsiorfiusunissaaq ilinniarfiup aaqqisuussaaneranik sammisaanillu akimuisuni, ataatsimut isiginnissinnaanermik attassiinnarsinnaanissat
• ilinniartutta pikkorissartullu sapinngisamik pitsaanerpaanik angusaqarnissaannut periarfissinnissaannullu piumassuseqarnissat anguniagaqarusussuseqarnissallu
• ilinniarfiup ineriartornissaanut toqqammavissiisinnaanissat
• isumagissuunissat, qiimasuunissat kiisalu akuersaartuunissat

Iluaqutaassaaq:

• minnerpaammik marlunnik oqaaseqartuunissaq (kalaallisut/danskisut) tuluttullu piginnaaneqarluarneq
• allannguiniarnernik piviusunngortitsinernillu misilittagaqarneq
• anguniagassanik takorluuisinnaassuseqarneq, isumassarsiullaqqinneq uteriinnerlu

Atorfik maanna akissaateqarfimmi 37-imi inissisimavoq

Tunngaviusumik isumaqatigiissutit malillugit atorfinititsisoqassaaq, qinnuteqartorli tjenestemanditut atorfeqariissappat Kalaallit Nunaanni tjenestemandit pillugit inatsit naapertorlugu tjenestemanditut atorfinititsiusoqarsinnaavoq.

Atorfimmi piffissaq suliffiusussaq killiligaanngilaq, qaangiuttoornersisinnaanermut - sulinngiffissaraluillu annaasat akilerneqarnissaannik aalajangersakkat atuutinngillat, sap. ak. nal. ak. tunngaviusumik suliffiusussat 40-iipput.

Akissarsiat atorfininnermilu atugassarititaasut

Akissarsianut- atorfininnermilu atugassarititaasunut tunngatillugu, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarneranni, Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut, naapertorneqassapput.

 

Ineqarneq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalillunilu atorfeqarunnaarnermi qimanneqassalluni.

 

Paasissutissat sukumiinerusut

Atorfik annertunerusunik paasisaqarfigerusukkukku siulersuisuni siulittaasoq Birgit V. Niclasen oqarasuaatikkut: +299 523832, imal. e-mailikkut:bivn@allorfik.gl attavigisinnaavat.

 

Kalaallit Nunaat Namminersorlutillu Oqartussat nittartakkami: www.nanoq.gl, atorfiit nalaanni annertunerusumik paasisaqarfigisinnaavatit.

Qinnuteqaat

Qinnuteqarfissaq kingulleq: 17. februar 2023

 

Qinnuteqartunik oqaloqateqarnerit:

Siuliit sap. ak. uge 8-imi ingerlanneqassapput

Tullii siuliani oqaloqatigiinnernit toqqakkat suliffigisimasanullu paasiniaanerit sap. ak. 9-imi ingerlanneqassapput  

Atorfinititsinissami ataatsimiititaliaq siulersuisunik sulisullu sinniisaannik ilaasortaqarpoq.

 

Namminersorlutik Oqartussat naatsumik oqaatigalugit

Kalaallit Nunaanni namminersorneq eqqunneqarpoq juunip 21-ani 2009. Namminersorlutik Oqartussat Naalakkersuisoqarfinnut qulinut agguakkamik 650-illu missaannik sulisulimmik qitiusumik aqutsisoqarfeqarput, taakku ataanni immikkoortortarpassuaqarpoq katillutillu 2500 missaanniipput.

Naalakkersuisoqarfiit politikkikkut aalajangiinissamut patajaatsumik tunngavissinnissaasa qulakkeerneqarnissaa politikkikkullu aalajangiussat piviusunngortinnissaat, qitiusumik aqutsisoqarfiup suliassarai. Innutaasunik 56.000-it missaanniittunik qanimut sullissinissaap piviusunngortikkiartuaarnissaa, pisortaqarfiit iliuusissatut siunniussaasa pingaarnerit ilagaat.