Nøglepersonuddannelsen.

Inuk pingaarutilik/pingaarnertut attavittut ilinniakkap periarfississavaatit, aangajaarniutinik aningaasanoorajunnermillu pinngitsuuisinnaajunnarsimasut katsorsartinnissamullu kajumissaarilersinnaallutit.

Inuk pingaarutilik/pingaarnertut attavittut ilinniarnerup suna siunertarivaa?

Pikkorissarnerup siunertaraa, ilinniarsimasutut aangajaarniutinik katsorsaariaatsillu ilisimasaqarfiginerulernissai, pinngitsuuisinnaajunnaarnermut peqqutaasut assigiingitsut paasisinnaangornissaa, katsorsartinnissamullu kajumissaarilersinnaanissaq aammalu Kalaallit Nunaanni katsorsartinnissamut periarfissat suuneri ilisimanerulernissaa.

Pikkorissartitsineq ulluni aqqanilinnik sivisussuseqarpoq.

Inuk pingaarutilik/pingaarnertut attavittut ilinniarneq kikkunnut tunngasuuva?

Peqqinnissaqarfimmi, ulloq unnuarlu paaqinniffinni, ilinniarfinni, kommnunini ingerlatsivinni suliffeqarfinnilu namminersortunit ingerlanneqartuni ilinniagalinnut tamanut tunngasuuvoq.

Ilinniarneq naammassigukku katsorsaasutut ilinnialernissannut periarfissaqalissaatit.

Piumasaqaatit

Isumaginninnermi, perorsaanermi, peqqinnissaanermullu tunngasunik ilinniagaqassaatit. Ilinniagallit allat, allamik aanngajaarniutinik aningaasanoornermillu pinngitsuuisinnaannginnermik katsorsaanermik suliaqartut naapertuuttumik ilinniagaqarsimaneq misilittagaqarnerluunniit uppernarsaatissaqarpat, immikkut naliliivigineqarnikkut ilinnialernissamik neqeroorfigineqarsinnaassapput.

Paasissutissat pingaarutillit

Inuk pingaarutilik/pingaarnertut attavittut ilinniarneq Peqqissaanermik ilinniarfimmi Nuumiitumi ingerlanneqassaaq piffissami 20. oktober – 31.oktober 2025

Pikkorissarnermut peqataaneq akeqanngilaq, pikkorissaanermut atorneqartut aammalu nerisaqarneq, ullukkut, ullup qeqqanut ualikkullu pikkorissaanerup ingerlanerani.

Pikkorissartussap sulisitsisuata angalaneq, angalanermullu atatillugu ineqarneq, pikkorissarnerullu nalaani ineqarneq isumagissavaa.

Pikkorissaaneq kalaallisut qallunaatullu ingerlanneqassaaq

Malugiuk: Qinnuteqaatit suliarineqassaaq, tigusaasimanissarli allagarsinermi aatsaat paasitinneqassaaq.

Eqqaamajuk sulisitsisup qinnuteqarnerit tunngavilersuusiussammagu.