Tusagassiorfinnut nalunaarut

Inuussutissanut sammititanik Peqqissaanermik Ilinniarfiup (PI) silataani, ilinniartunut illoqarfimmilu najugaqartunut, avatangiisinik peqqinnartunik pilersitsinissaq, aningaasaateqarfimmit Villum-fondimit taperserneqarpoq.

Aningaasaateqarfik Villum-fondi aningaasaliissutit ilaannit ”Ullup qaamarna silaannarillu” qulequtsiullugu PI-mut 500.000 koruuninik aningaasaliivoq. Aningaasat tapiissutit, ilinniarfiup silataata, timimik atuineq, ataatsimoorneq peqqinnerlu qitiutillugit, peqqissarfittut nutaaliatut allanngortinnissaanut atorneqassapput. Ilinniarfiup silataani timigissartarfiliortoqassaaq, ataatsimoorfissamik illuaraqarlunilu ikumaartitsivissalimmik, ilinniartunit illoqarfimmiunillu atorneqarsinnaasunik sanasoqassaq.

Bettina Hanghøj Johansen, Peqqissaanermik Ilinniarfimmi pisortaq ima oqaaseqaateqarpoq: " Taama annertutigisumik taperserneqarneq nuannaarutigeqaarput. 2026-imi silaterput immikkut ittumik peqqinnarnerulersillugu allanngortinneqassaaq. PI nunatsinni inuussutissarsiutinut sammititanut peqqissaanermik ilinniarfittut, peqqinnissamut ataatsimoornermullu tunngasutigut, tamatigut siuttuuniarsarissaaq."

Timimik atuinikkut inuusuttunut periarfissamik ataatsimoornnermillu siuarsaanissaq, PI-mit anguniagaavoq. Ilinniarfiup silataani taamatut periarfissiinikkut, ilinniarfimmi ilinniartut 200-it sinneqartut ilinniartitsisullu sungiusarnerup, nerisat peqqinnerullu ilinniartitsinermi akuutinnerunissaannut periarfissinneqassapput.

Aningaasaateqarfiup Villum-fondip saniatigut aningaasaateqarfimmit Nordea Fondimit Paarisamiillu Peqqinnerunissamut suliniutinut aningaasaliissutinit, PI taperserneqarpoq.

Ilinniarfiup silataani periarfissaq nutaaq illoqarfimmi innuttaasunit aamma atorneqarsinnaassaaq. Taamaammat suliniut kinguaariit inuiaqatigiinnilu kikkulluunniit akimorlugit peqqinnermik ataatsimoornermillu nukittorsaanissamut iluaqutaassaaq.

Aningaasaateqarfik Villum Fonden

Aningaasaateqarfik Villum Fonden teknikkimik pinngortitamillu ilisimatusarnermik iliniartitaanermillu, kiisalu nunatsinni nunanilu allani siunertanut avatangiisinut, inuttut inooqataanermut kulturimullu tunngasunut tapersersuisuuvoq. Aningaasaateqarfik, civilingeniør Villum Kann Rasmussenimit – VELUX igalaanik isumassarsisumit, VKR Holding A/S-imillu tunngaviliisumit pilersinneqarpoq.

Suliniut pisortatigoortumik nalunaarummi ”Qaamaneq silaannarillu” qulequtsiullugu, aningaasaateqarfimmit hvorunder Villum Fondimit tamat iluaqutissaannik suliniutinik, isumasarsiat nutaarluinnaat atorlugit, ulluinnarni illup iluani sammisanik silamut qaamanermut silaannarissumullu nuusseqataasinnaasunik tapersersuisumit, taperserneqarpoq.

Paasissutissat sukumiinerusut:
Ilinniarfiup pisortaa Bettina Hanghøj Johansen
oqarasuaatikkut: +299 52 87 71
imal. mailikkut: behj@pi.gl attavigalugu pissarsiarineqarsinnaapput.