Tusagassiorfinnut nalunaarut

A.P. Møllerip nuliatalu Chastine Mc-Kinney Møllerip siunertanut nalinginnaasunut aningaasaateqarfiannit (aningaasaateqarfik A.P. Møller Fondimit) Nuummi Peqqissaanermik Ilinniarfik 2 millioner koruuninik aningaasaliiffigineqarpoq. Aningaasaliissutit, teknologi atorlugu qitiusumik ilinniarfissamik nutaamik pilersitsinermut, atorneqassapput.

Peqqissaanermik Ilinniarfinmmi- ilaatigut sundhedsassistentinngorniat, tapersersortinngorniat, portøritut annaassiniartartunngorniat, klinikassistentinngorniat kigutigissaasunngorniallu ilinniartitaasarput. Ilinniarfimmi ilinniartitaanerni assigiinngitsuni ilinniartut 200-it missigisarpaat.

Suliniummi qitiusumik ilinniarfimmik uummaarissumik, ilinniakkat periutsillu akimorlugit ilinniarnermik siuarsaasussamik pilersitsinissaq siunertaavoq. Ilinniarneq misileraaffiunerusoq takussutissiisorlu ikorfartorniarlugu, tekonologi nutaaliaanerusoq- soorlu isarussat immikkut ittut atorlugit pivisuutitamiinneq, inuusat, iPad-it qarasaasiallu isiginnaarutitai atorneqalissapput. Ilinniartut piviusunik paasiniaanissamut periarfissinneqassapput, avatangiisinilu ilinniarfinni pimoorussiviusuni, atuagarsornerup sulinerullu ataqatigiinnerat misigissallugu.

Ilinniarfik nunarput tamakkerlugu ilinniarfiuvoq, ilinniartullu ilinniarnertik naammassigaangamikku pingarnertut Peqqinnissaqarfimmi imal. kommunimi suliffeqalersarput.

Peqqissaanermik Ilinniarfiup pisortaa Bettina Hanghøj Johansen ima oqaaseqaateqarpoq:

” Aningaasaateqarfiup A.P. Møller Fondip tapersiinera, ilinniarfiup teknologimut tunngatillugu ineriartoqqissinnaanissaanut periarfissiisoq tulluusimaarutigeqaarput. Ilinniartut periuseq nutaaq atorlugu piginnaasatigut sungiusarnissamut, atuagarsornerullu sulinerulu ataqatigiissinnissaannik ilinniarnissamut assisaqanngitsumik periarfissinneqassapput.”

Suliniut ilinniarfimmi sulisunik ilinniartunillu peqataaffigineqartussaq, 1. januar 2025 aallartissaaq ukiullu aappaa affaanik sivisussuseqassalluni. Qitiusumik ilinniarfiup atoqqaartinneqarnissaanut qaaqqusisoqassaaq.

Pisortaq Bettina Hanghøj Johansen ima oqaaseqaateqarpoq:

"Ilinniartitaaneq pillugu politikkikkut anguniagassatut siunniussap piviusunngortinnissaa suliniutigaarput, teknologilu atorlugu qitiusumik ilinniarfimmik pilersitsinikkut, ilaatigut ilinniartitseriaatsinik nutaaliortunik teknologimik paasinninnermik siuarsaasunik neqeroornikkut, inuusuttunik soqutiginnilersitsinissaq kissaatigaarput. Taamaliornikkut siunissami suliffissanut piareersarluaannarnagit, ilinniakkaminnik naammassinnerlaat, suliani naapertuuttuni sulinermik misilittagaqarnissaat qulakkiissavarput. Nalinginnaasumik ilinniartitsinerup ingerlanneqarnissaattaaq erseqqissassallugu pingaaruteqarpoq."

Teknologi atorlugu qitiusumik ilinniarfik teknologimuinnaq tunnganngilaq, aammali sulisut ilinniartitsinermi sakkussanik eqqortumik atuinermut ilinniartitaanissaannut tunngalluni. Atortussat digitaliusut ilinniartitseqqinnerlu taakkuupput immikkoortut annertuut marluk aningaasaliissutinit akilerneqartussat.

Meeqqanut, Inuusuttunut Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede ima oqaaseqarpoq:

”Teknologi atorlugu qitiusumik ilinniarfeqalernikkut ilinniartitaanernik ilinniartitsinermillu nukittorsaanissamut periarfissinneqassaagut. Taamaaliorneq ilinniartutsinnut, kulturitsinnut nunattalu siunissaanut aningaasaliineruvoq. Ilinniartitaanernut tunngatillugu inuiaqatigiittut pisariaqartitagut immikkorluinnaq ittut ineriartornerlu naleqqussarniarlugit nutaamik eqqarsassaagut, taamaalillutalu siunissamut atuuttussanik pilersitsilluta. Innuttaasut ilinniartitaanissaat ataatsimoorluta akisussaaffigaarput, piviusunngornissaa qilanaaraarput. Peqqissaanermik Ilinniarfik pilluaquarput.”

Paasissutissat sukumiinerusut:

Pisortaq Bettina Hanghøj Johansen, oqarasuaatikkut: +299 52 87 71 imal. mailikkut: behj@pi.gl attavigalugu pissarsiarineqarsinnaapput.