Kantiina

Kantiinami nerisassanik- pisortatigut innersuussutaasut naapertorlugit- peqqinnartunik mamasaakkanillu sassaallertoqartarpoq peqqinnarnerusumillu inooriaaseqarnissaq tapersersorneqarluni.

2006-imi nerisat pillugit politikkiliortoqarpoq kantiinamullu najoqqutassiortoqarluni, toqqammavigisat suli malinneqarput inerisarneqartuarlutilli allanngorartinneqartuarlutik. Nerisat pillugit politikkimi Kalaallit Nunaanni nerisat pillugit siunnersuutit Kalaallit Nunaanni Inuussutissat pillugit Siunnersuisoqatigiinnit suliarineqartut malinneqarput. Kalaallit Nunaanni inuussutissat pillugit siunnersuutit uani atuakkit

Kantiinami ajornangippat nerisassiassat akuutissartaqanngitsut atorneqarnissaat salliutinneqarpoq. Taamaaliornikkut periarfissatigut akuutissanik atuineq annikillisarniarneqarpoq. Nerisassianut akugisat akuutissartaqanngitsut pingaartumik eertat amitsukujuut panertut, linsit, kikeertat, bulguri assigisaallu nerisassianut neqitaqanngitsunut salatinullu akuliullugit atorneqarput.

Salatinik nammineq tigooraavik sapinngisaq tamaat assigiinngiiaartitsinissaq qitiutillugu inerisarneqartuarpoq. Timip protein pisariaqartimmagu qaarsillarnarmallu proteinimik akoqartitsinissaq immikkut sammineqarpoq.

Kantiinami kaagiliortoqarlunilu boorluliortoqartarpoq sapinngisarlu tamaat qajuusat akuutissartaqanngitsut atorneqartarput.

Inussiarnersumik inuulluaqqusillunga

Kantiinami aqutsisoq Birgitte Nathanielsen