Maajip ulluisa 27-ianni supervisorit (ikorfartuisut)13-it Peqqissaanermik Ilinniarfimmi ilinniarnerminnik naammassinnillutik allagartartaarput.

Ikorfartuisut ilinniagaqassutsikkut ineriartornissamik, inuttut nalerisimaarnissamik sulinermilu pimoorussiuarnissamik qulakkeereqataammata suleqatinut allanullu ikorfartorneqarnissamik pisariaqartitsisunut annertuumik pingaaruteqassapput.

Nutaatut maanna ikorfartuisutut ilinniartitaaneq Systemisk Institut for Familieterapi (SIF) suleqatigalugu ingerlanneqarpoq, Peqqissaanermillu Ilinniarfiup periarfissaq manna iluatsillugu suleqatigiilluarneq qujassutigaa, ikorfartuisunngorlaallu pilluaqqungaarlugit.

Nuannaarutaaqaaq maanna taakku ikorfartuinermi piginnaasaminnik annertuunik inunnut allanut tunisisinnaanngormata. Ilinniarnerup naliliivigineqarnerani ilinniartut ilaat ima oqarpoq: "Ilinniartitaaneq inuttut ilinniakkatigullu ineriartorfiuvoq - ilinniakkatiguinnaanngitsoq aammali inuunermi sakkussannik tunisisoq. Sulininni inuuninnilu tamatigut SIF-imit ilalersorneqarpunga."

"Misigisat tunngavigalugit ikiorfartuisutut ilinniartitaaneq annertuumik tunisivoq, nammineq allallu inuttut ilinniagalittullu nukittoqutaannut naleqartitaannullu tunngatillugu periarfissanik nutaanik takunnissinnaalersitsisoq "

"ikorfartuisutut ilinniartitaanerup sunniuteqarsinnaasutut misigalunga sulininni ingerlariaqqinnissannut sakkussannik tunivaanga "

"Misigisat tunngavigalugit ikorfartuisutut ilinniartitaaneq nunatsinni isumalerujussuuvoq. Qanoq ililluni ajornakusoortitanik qajassuartumik takussaasumillu ammaassisinnaanermut pitsaasumik tunngavissiivoq"

"Ilinniartitsisut pikkorillutillu misilittagartuujupput, pingaarnerpaatulli toqqissinartumik assullu inerisaasumik inummiit inummut ilinniartitsisinnaassuseqarlutik"

Aggustimi ilinniartut nutaat aallartissapput. Pi.gl -imi peqataaniarluni nalunaartoqarsinnaavoq

Allagartartaarnermi assilisat takuneqarsinnaapput: