Ullumi juunip ulluisa 15-anni nal. 13.30 kigutigissaasunngorniat arfinillit ukiuni marlunni ilinniareerlutik ilinniakkaminnik naammassinninnerat pillugu naggataarnersiortoqarpoq. Arnat taakku arfinillit tamarmik soraarummeernerminni qaffasinnerpaanik karakteereqarlutik angusipput.

Ilinniartitaanerup sulinermik sungiusarnertaa nunatsinni kigutilerivinni ingerlanneqarpoq atuagarsornertaalu Peqqissaanermik Ilinniarfimmi ingerlanneqarluni. Tassani Københavnip Universitetiani klinikassistentinngornianut kigutigissasunngornianullu ilinniarfimmi ilinniartitsisunit ingerlanneqarpoq. Ilinniartitaaneq Kalaallit Nunaanni kigutigissaanermik isumaginnittussatut immikkut aaqqissuussaavoq. 

Siuliani ilinniartuusimasunut sanilliullugit ilinniartut - kigutigissaanermi anguniagassatut siunniussat naapertoqqissaarlugit- peqqinnissaq pillugu ilinniartitsisinnaanissaat peqqinnissamillu siuarsaasinnaanissaat pingaartinneqarnerupput. Meeqqat inuusuttullu qarngup peqqissuuinnarnissaa peqqissunngornissaaluunniit anguniarlugu iliuuseqarnissaannut ikiorsernissaat unammilligassaavoq. Tamatuminnga naammasinnissinnaanngitsut kigulluutinik pitsaaliuinermut, kigulluutiminnik qanerluutiminnillu suliaritinnissamut tapersersorneqarsinnaapput. Kingorna peqqinnartunik toqqaasalernissaq neriuutigineqarsinnaavoq. Peqqinnerulerneq nakorsartinnikkut anguneqarsinnaanngilaq. 

Inuuneq tamaat atorluarsinnaasunik kiguteqarnissamut peqqissumillu qaneqarnissamut suut pisariaqartinneqarnerat kigutigissaasunngorlaat ilisimavaat. Angajoqqaanut soqutiginnittunut , meeqqanut, inuusuttunut inersimasunullu tamatuma piviusunngortinnissaanut qanoq inuuneqarnissamik iliuuseqarnissamillu ilinniartitsinikkut ikiuunniarlutik, ilisimasaminnik atuinissartik qilanaaraat. 

 

Kigutigissaasunngorlaat saamerlerniit:

Pani Pipaluk Nathansen, Nuuk

Mannannguaq Egede Mathæussen, Nuuk

Paneeraq Sandgreen, Aasiaat

Elisabeth Kleist, Sisimiut

Tina Holm Fisker, Nuuk

Biibi-Tove Rethmar, Narsaq