Peqqissaanermik Ilinniarfiup Silkeborgimilu tunngaviusumik isumaginninnermik peqqissaanermillu ilinniarfiup isumaqatigiissutaat juunip ulluisa 14-anni atsiorneqarpoq. 

Ilinniarfimmi ilinniartitsissutaasunut tunngatillugu iliuusissanik nutaanik inerisaanissaq, politikkikkut ilinniagaqassutsikkullu unammilligassanut nutaanut sillimaniarneq suleqatigiinnermi anguniagassatut takorluugaapput. 
Tamatuma saniatigut Nunani Avannarlerni suliniutini suleqataanissamut periarfissat misissorniarneqarput. 

Sulianik ingerlatsinermi piginnaasat pisariaqartinneqartut qulakkeerneqarnissaat ilinniarfiillu taakku aningaasarsiorfiisa inerisaaviginissaat pillugit suleqatigiinneq pilersinneqassaaq. 

Makku suleqatigiissutaassapput: 
Ilinniartitsineq, siunnersuineq, misilittakkanik ilinniartitsisunillu paarlaasseqatigiinneq kiisalu suliniutinik allanik ilinniarfiit soqutigisaannut iluaqutaasunik inerisaaneq suliaqarnerlu. 

Suleqatigiinnissamut isumaqatigiissummik atsiornermut atatillugu pisortap tullia Karen Brix Roed immikkoortortamilu aqutsisoq ilinniartitaanermi siunnersorti Lise Knokgaard juunip 13-aniit 16-anut maanga tikaraarput. 

Ulluni taakkunani marlunni pissanganarlutillu isumassarsinartuni Silkeborgimi tunngaviusumik isumaginninnermi peqqissaanermilu iliniarfimmi peqqinnissamut tunngatillugu ilinniarsimanngitsunik ilinniagaqalersitsiniarneq inuusuttunullu ilinnialernissamut suliffeqalernissamullu piareersimanngitsunut iliuuseqarneq pillugit saqqummiussisoqarpoq. 
Tamatuma saniatigut Danmarkimi peqqinnissakkut ilinniatitaanerni allannguutit pillugit saqqummiussisoqarpoq. 

Ataatsimiinnerit ilaanni Namminersorlutik Oqartussani Suliffeqarnermut-, Ilinniartitaanermut – Isumaginninnermullu Naalakkersuisoqarfinnit sinniisut peqataapput. 

Assimi saamerliuvoq Peqqissaanermik Ilinniarfiup pisortaa Lisa Ezekiassen sanileraalu Silkeborgimi tunngaviusumik isumaginninnermut peqqissaanermullu ilinniarfiup pisortaata tullia Karen Brix Roed.